Xogamos Todxs (Programa transversal)

A actividade lúdica é un recurso educativo próximo á infancia e facilitador de aprendizaxes, polo interese que esperta nos nenos e nenas. O xogo, por canto todo o que implica de aprendizaxe, é un instrumento didáctico que lles achega unha educación integral para a vida, conxugando “saber, saber facer e saber ser”. En virtude de todas as posibilidades que ofrece, o xogo constitúe un elemento fundamental que tamén debemos ter en conta de cara á adquisición de valores, construción da autoestima e autoimaxe.

Resulta patente que na etapa de Primaria aínda segue sucedendo que nenos e nenas socializan de forma distinta, e adquiren unha construción psicosocial do seu xénero cunha marcada diferencia entre homes e mulleres. Por exemplo, é un feito que á hora de xogar, de forma espontánea, nenas se agrupan con nenas e nenos con nenos.

Seguimos, inconscientemente, educando aos nenos e nenas en que os roles que deben interiorizar son diferenciados: os homes non choran e han ser valentes e fortes, e ter profesións “importantes”; as mulleres son máis sensibles e con capacidades máis acaídas para a educación e o coidado dos demais.

Espontaneamente, tanto no ámbito familiar coma no escolar ou extraescolar, a medida que os nenos e nenas medran preséntanselles opcións diferentes: desde a propia vestimenta ata os xogos ou actividades ás que reciben o convite para participar.

Xogamos todxs (que pronunciaremos “xogamos todex”) é un programa transversal de ECT, busca que o equipo educativo tome conciencia desta realidade en todas as propostas lúdico-educativas da xornada, de tal forma que sexan pensadas e postas en práctica sempre con criterios de igualdade. O obxectivo fundamental é que nenos e nenas vivan unha mesma experiencia do campamento. Así pois, o equipo educador seguirá as seguintes premisas:

Convidar ás familias a que todos e todas veñan ao campamento con roupa e calzado axeitado para xogar. As saias e os vestidos, así como as sandalias, non son as prendas máis axeitadas para correr, dar volteretas, facer rutas de sendeirismo, pasar gateando entre as pernas dos compañeiros e compañeiras, etc.

Facer grupos mixtos. Promoverase que os nenos e nenas se agrupen de forma mixta. Valerémonos de estratexia e negociación para que isto suceda. Por exemplo, se hai un grupo de nenas amigas e outro grupo de nenos amigos, podémolos xuntar para entre ambos formar un equipo para un determinado xogo.

Propostas de xogo con criterios de igualdade. Todos e todas compartirán o xogo. En ningún momento pode suceder que os nenos xoguen a unha cousa e as nenas a outra distinta. Tampouco poden primar as preferencias duns ou doutras.

Utilizarase linguaxe inclusiva, na que non prime o masculino como referencia. Coidarase especialmente a forma en que nos diriximos, chamamos ou animamos ás persoas participantes do xogo (en ningún caso os nenos son “campións” e as nenas “bonitas”; diremos “campión” e “campioa”).

Atención ao rol da persoa líder do grupo. De darse o caso, debemos contar con capitáns e capitás de forma alterna.